सविन प्रियासन
दाङ, २२ भदौ । दाङको देउखुरीमा  नेपाल कम्यूनिष्ट पार्टी  माओवादी (मातृका) समूहले  व्यापारीहरुसँग किटानीसहित चन्दा माग गर्न थालेपछि व्यापारीहरु आतंकित बन्न थालेका छन् ।
    सुरक्षा निकायबाट सुरक्षित मानिने भालुवाङ क्षेत्रमा माओवादीले चन्दा दिन भन्दै व्यापारीहरुलाई पत्र पठाएको छ । पत्र पठाएपछि यहाँका व्यापारीहरु आंतकित बनेका हुन् । देश र जनताको मुक्तिका लागि, देशका भ्रष्ट कमिशनखोर, प्रतिकृयावादी र परिस्थितिसँग कडा सघर्ष गर्न र सम्पूर्ण खाले उत्पीडन, अन्याय, अत्याचारको अन्त्यको साथै समान हकअधिकारका लागि आवाज बुर्लन्द गर्न चन्दा माग गरेको पत्रमा उल्लेख छ । दाङ जिल्लामा नेकपा माओवादीलाई अझै सुदृढ गरी विस्तार, व्यवस्थित र परिचालनका लागि रकम आवश्यक परेको भन्दै जिल्ला सेक्रेटरी आकाश घर्तीको हस्ताक्षर गर्नुभएको पत्र यहाँका व्यापारीहरुलाई दिइएको छ । पत्रमा रु. ५ हजार रुपैया भनेर चन्दा तोकिएको छ ।
    भालुवाङमा लामोसमयदेखि व्यवसाय गर्दै आएका एक व्यापारीले आफूलाई रु. ५ हजार चन्दा कटिनीसहित पत्र पठाएको  बताए । उनले केहीदिन अगाडि २ जना युवाहरु पसलमै आएर पत्र दिएको बताउँदै भनेजति चन्दा नदिएमा भौतिक कारवाही हुने चेतावनीसमेत दिएको उनको भनाइ थियो । अधिकाशं व्यापारीहरुलाइ पत्र थमाउदै चन्दा नदिएमा भौतिक कारवाही हुने चेतावनी दिएको व्यापारीहरु बताउँछन् । यसरी व्यापारीहरुमा किटानीसहितको चन्दा पत्र आउँदासम्म यहाँ अवस्थित इलाका प्रहरी कार्यालय भालुवाङ ,ज्वालामाइ गण भालुवाङ ,सिमा सुरक्षा बल लमही र व्यापारीहरुको हकहितका लागि खोलिएको छाता संगठन राप्ती उद्योग वाणिज्य संघ भालुवाङलाई भने कुनै जानकारी नभएको बताइएको छ । केही समय अगाडि दाङको तुलसीपुरक्षेत्रमा चन्दा आतंक निक्कै मौलाएको थियो ।