रुद्र सुवेडी
नेपालगन्ज, १३ साउन  
 बाँकेमा झाडापखालाबाट तीन जनाको मृत्यु हुनुको सयौं मानिसहरु बिरामी परेका छन ।
  वितेको २४ घण्टाको अवधीमा नेपालगंजका अस्पतालमा उपचारका लागि ल्याइएका बिरामीमध्ये तीन जनाको मृत्यु भएको जिल्ला जनस्वास्थ्य कार्यालय, बाँकेले जनाएको छ ।
मृत्यु हुनेमा दाङ तुलसीपुर–८ की ६५ वर्षीया कलावती बुढाथोकी, नेपालगंज–५ गौसिया टोलकी ५ वर्षीया जसविन हल्वाई र एक्लैनीका ५ वर्षीय तानिया हल्वाई रहेको जिल्ला जनस्वास्थ्य कार्यालय, बाँकेका महामारी नियन्त्रण विभागका रामबहादुर चन्दले जानकारी दिए ।
 नेपालगंजस्थित भेरी अंचल अस्पताल र नेपालगन्ज मेडिकल कलेज शिक्षण अस्पतालमा झाडापखलाका २ सय भन्दा बढी बिरामी भर्ना भएर उपचार गराई रहेका छन ।
  भेरी अंचल अस्पतालमा ४८ जना र शिक्षण अस्पतालमा १ सय ५८ जना बिरामीले उपचार गराइरहेको र यो संख्या बढ्दै गएको जनस्वास्थ्य कार्यालयले जनाएको छ ।
  भेरी अंचल अस्पताल नेपालगंजकी डा. सिन्धु शर्माले अस्पतालमा उपचारका लागि आएका प्रायः सबै बिरामीहरुमा एकै खालको लक्षण देखिएको बताईन ।
  बुधबारदेखि फैलिएको झडापखलाका कारण नेपालगन्ज नगरपालिका वार्ड नं. २, ४, ५, ६, ८ र १४ का मानिसहरु बढी प्रभावित भएको भेरी अञ्चल अस्पतालका स्वास्थ्यकर्मी  दानबहादुर ठकुल्लाले बताए ।
   उनका अनुसार पछिल्लो समयमा नेपालगन्ज र छिमेकी जिल्ला बर्दियाबाट समेत झाडा पखालाका विरामीहरु आउने क्रम ज्यादा रहेको बताए । उनले बेडको अभावमा एउटै बेडमा ४ जनासम्म विरमी राखेर उपचार गर्नुपरेको बताए । उनले बिरामी आउने र निको भएर जानेक्रम जारी भएको जानकारी  दिए ।