दाङ ९ साउन । संविधानसभाका उपाध्यक्ष पूर्णकुमारी सुवेदीले साउन १७ गते नै मुलुकले नयाँ प्रधानमन्त्री पाउने वताएकी छन् । नेपाल पत्रकार महासंघ दाङले आयोजना गरेको पत्रकार सम्मेलनमा बोल्दै उपाध्यक्ष सुवेदीले यस्तो वताएकी हुन् । ‘दुईपटक प्रधानमन्त्रीको निर्वाचन सफल हुन सकेको छैन, मलाई विश्वास छ, साउन १७ गते मुलुकले नयाँ प्रधानमन्त्री पाउने छ’ उनले थपिन‘दलहरुले मुलुकलाई अनिर्णयको बन्दी बनाउनु हुदैन ।’ सञ्चारकर्मीहरुको प्रश्नमा १७ गतेको निर्वाचनमा कुनै पनि दल तटस्थ नबस्ने दावी गर्दै सुवेदीले आगामी प्रधानमन्त्रीको निर्वाचन सार्थक हुने वताइन ।
आगामी निर्वानबाट को प्रधानमन्त्री बन्छ त भन्ने सञ्चारकर्मीहरुको प्रश्नमा सुवेदीले यसको अडकल अहिले नै काट्न नसकिने भएपनि जो भएपनि नयाँ प्रधानमन्त्री चुनिने वताइन । ‘आगामी प्रधानमन्त्री को बन्छ भन्नेमा अडकल अहिले नै नकाटि हालौं तर आगामि निर्वाचनबाट नयाँ प्रधानमन्त्री निस्किने निश्चित छ’ सुवेदीको भनाइ थियो । संविधान लेखनकार्य आगमि एकवर्ष भित्रै पुरा हुने र यसका लागि धेरै कार्यहरु भइसकेको वताउँदै सुवेदीले राज्य पुनःसंरचना आयोग संविधान निर्माणका लागि सहयोगी हुने वताइन । संविधान निर्माणको सन्दर्भमा ८० प्रतिशत कार्य सम्पन्न भइसकेको र साउन १५ गतेबाट संविधान निर्माणको काम सूचारु हुने जानकारी दिदैं सुवेदीले सबैको सहयोगले मात्र संविधान लेखन कार्य सम्पन्न हुने वताइन ।